سپیکر قومی اسمبلی راجہ پرویز اشرف نے کہا ہے کہ سابق وزیراعظم شہید بے نظیر بھٹو نے ملکی سیاست میں انمٹ نقوش چھوڑے ہیں جن کی بحالی جمہوریت کے لیے جدوجہد کو ہمیشہ یاد رکھا جائے گا۔
وہ منگل کو اسلام آباد میں شہید بے نظیر بھٹو کے 69ویں یوم پیدائش کے سلسلے میں خواتین پارلیمانی کاکس کے زیر اہتمام منعقدہ تقریب سے خطاب کر رہے تھے۔
راجہ پرویز اشرف نے کہا کہ بے نظیر بھٹو پارلیمنٹ کے اندر اور باہر ایک مثالی لیڈر رہیں۔ انہوں نے کہا کہ بے نظیر بھٹو درحقیقت اس فلسفے کی بانی ہیں کہ جمہوریت بہترین انتقام ہے۔
انہوں نے جمہوری اداروں کو مزید مضبوط بنانے اور مظلوم خواتین کے حقوق کے لیے جدوجہد کرنے کی ضرورت پر زور دیا۔
اس موقع پر خطاب کرتے ہوئے سابق وزیراعظم یوسف رضا گیلانی نے کہا کہ بھٹو خاندان نے ہمیشہ جمہوریت کی خاطر قربانیاں دی ہیں۔