آٹا پوائنٹ پر بھگدڑ کے سبب اموات کا سلسلہ تھم نہیں سکا -آج بھی ساہیوال میں ایک دلخراش واقعہ پیش آیا جب آتا لینے کی خواہش میں آئی ایک اور خاتون دم توڑ گئی -نگران وزیراعلیٰ پنجاب محسن نقوی نے ساہیوال میں مفت آٹا سنٹر پر بھگدڑ کے واقعہ کا نوٹس لیتے ہوئے ڈی آئی جی سپیشل برانچ کو افسوسناک واقعہ کی تحقیقات کا حکم دیتے ہوئے کہا ہے کہ تحقیقات کرکے حقائق سامنے لائے جائیں اور غفلت کے ذمہ داروں کا تعین کیا جائے۔جہاں بھی غفلت سامنے آئی،بلا امتیاز کارروائی کی جائے گی۔ انہوں نے ہدایت کی کہ واقعہ میں زخمیوں کو علاج معالجے کی بہترین سہولتیں فراہم کی جائیں۔
محسن نقوی نے کہا کہ ایک ایک انسانی جان قیمتی ہے۔سنٹرز پر ایسے انتظامات کئے جائیں کہ شہری باآسانی قطاروں میں آٹا حاصل کرسکیں۔ تمام سنٹرز پر انتظامات کو فول پروف بنایا جائے تاکہ مزید کوئی حادثہ نہ ہو اور آئندہ ایسے واقعات کے تدارک کیلئے اقدامات کئے جائیں۔ کمشنرز،آرپی اوز، ڈپٹی کمشنرز اور ڈی پی اوز اپنے شہروں میں سنٹرز کے انتظامات کا از سر نو جائزہ لیں۔