اسلام آباد(انٹرنیوز) صدر آصف زرداری نے یوم پاکستان پر ملک کو مسائل سے نکالنے ،سلامتی واستحکام کیلئے تمام سیاسی جماعتوں سے مل کر کام کرنے کی اپیل کرتے ہوئے کہا ہے کہ پاکستان اپنی خودمختاری پر سمجھوتہ نہیں کرے گا، قوم ،مسلح افواج کسی بھی جارحیت کا منہ توڑ جواب دینے کیلئے ہمہ وقت تیار ہیں،دہشت گردوں یا کسی گروپ کی جانب سے ملک کوغیر مستحکم کرنے کی کسی کوشش کو برداشت نہیں کیا جائے گا، ہمیں انسانی وسائل کی ترقی، ہنرمندی، زراعت، انفارمیشن ٹیکنالوجی، صنعتی ترقی، توانائی، گڈگورننس پر خصوصی توجہ دینا ہوگی، قوم مایوس نہ ہوملک کو معاشی لحاظ سے مضبوط و خودکفیل بنانے کیلئے پرعزم ہیں،غزہ میں فلسطینیوں کی نسل کشی پر تشویش ہے، عالمی برادری غزہ میں فوری جنگ بندی کرائے،حق خود ارادیت کے حصول تک کشمیریوں کیساتھ کھڑے رہیں گے ،مشکل وقت میں ساتھ دینے پرچین، سعودی عرب، یو اے ای، ترکیہ اور دوست ممالک کے شکر گزار ہیں۔تفصیلات کے مطابق یوم پاکستان پر پریڈ تقریب سے خطاب کرتے ہوئے صدر آصف زرداری نے وزیراعظم شہباز شریف اور مسلح افواج کے سربراہان کو سلام اور پاکستانی قوم کو یوم پاکستان کی مبارک باد دیتے ہوئے کہا کہ عہد کرتے ہیں کہ پاکستان کی ترقی، سلامتی اور امن کو اپنی جان سے زیادہ عزیز رکھیں گے، آج کا دن ہمارے لئے قومی اہمیت کا حامل ہے۔انہوں نے کہا کہ آج کے دن برصغیر کے مسلمانوں نے ایک الگ وطن کا مطالبہ کیا، قائد اعظم کی قیادت میں 7سال بعد ایک آزاد اور خودمختار ریاست قائم کی، پاکستانی قوم قیام پاکستان سے اب تک مختلف نشیب و فراز سے گزری ہے۔انہوں نے کہا کہ الحمدللہ آج ہم دفاعی اعتبار سے ایک مضبوط ملک ہیں، ہم نے بہت مشکلات کے باوجود دفاعی، صنعتی، ٹیکنالوجی و دیگر شعبوں میں ترقی کی منازل طے کیں، دنیا امن اور دہشتگردی کے خلاف ہمارے کردار اور قربانیوں کو مانتی ہے۔انہوں نے کہا کہ نوجوان اپنی صلاحیتوں کا استعمال کرتے ہوئے ملکی ترقی اورمستقبل کے امین ہیں، پاکستان کے عوام محنتی اور ذہنی طور پر بہترین ہے، اس وقت پاکستان کو مختلف معاشی، سماجی اور سیاسی چیلنجز کا سامنا ہے، بڑھتی آبادی، بیروزگاری اور غربت بڑے چیلنجز ہیں۔آصف زرداری نے کہا کہ خوشی ہے پاکستان میں انتخابی عمل کے بعد جمہوری حکومت قائم ہو چکی ہے، ہم سب کی ذمہ داری ہے تمام مشکلات کو مل کر حل کریں، ماضی میں بھی مشکلات کا مقابلہ کیا، اسی طرح آج بھی پاکستان کو چیلنجز سے نکال سکتے ہیں۔انہوں نے تمام سیاسی جماعتوں سے گزارش کی کہ مسائل کے حل کیلئے مل کر کام کریں۔صدر نے مشکل وقت میں پاکستان کا ساتھ دینے پرچین، سعودی عرب، یو اے ای، ترکیہ اور دوست ممالک کا شکریہ ادا کرتے ہوئے کہا کہ ایس آئی ایف سی عمل میں لائی جا چکی ہے، انسانی وسائل کی ترقی، ہنرمندی، زراعت، انفارمیشن ٹیکنالوجی، صنعتی ترقی، توانائی، گڈگورننس پر خصوصی توجہ دینا ہوگی، قوم مایوس نہ ہو،ہم پاکستان کو معاشی لحاظ سے مضبوط و خودکفیل بنانے کیلئے پرعزم ہیں۔انہوں نے کہا کہ ہمیں قومی اتفاق رائے کے ساتھ موثر حکمت عملی، دانشمندانہ انتظام، صوبوں اور وفاق کے مابین بہتر روابط کی اشد ضرورت ہے۔انہوں نے کہا کہ پاکستان اپنی خودمختاری پر کبھی سمجھوتہ نہیں کرے گا، پاکستانی قوم اور مسلح افواج کسی بھی جارحیت کا منہ توڑ جواب دینے کے لیے ہمہ وقت تیار ہیں۔انہوں نے کہا کہ دہشت گردوں یا کسی اور گروپ کی جانب سے پاکستان کو غیر مستحکم کرنے کی کسی بھی کوشش کو برداشت نہیں کیا جائے گا، پاکستان عالمی امن اور تمام ممالک کے ساتھ دوستانہ تعلقات کا خواہاں ہے، ہم ایک ذمہ دار ایٹمی طاقت ہیں اور پرامن بقائے باہمی پر یقین رکھتے ہیں۔انہوں نے کہا کہ آج کی یہ ولولہ انگیز پریڈ ایک مضبوط اور مستحکم پاکستان کیلئے ہماریقومی جذبوں اور امنگوں کی عکاس ہے، ہمیں قومی اتفاق رائے کے ساتھ موثر حکمت عملی، دانشمندانہ انتظام، صوبوں اور وفاق کیمابین بہتر روابط کی اشد ضرورت ہے۔صدر زرداری نے کہا کہ غزہ میں جاری تشدد اور فلسطینیوں کی نسل کشی پر گہری تشویش ہے، بین الاقوامی برادری غزہ میں فوری جنگ بندی کرائے اور اسرائیل کو ظالمانہ اقدامات سے روکے۔انہوں نے کہا کہ ہم بھارت کے تمام غیر قانونی اقدامات کی مذمت کرتے ہیں۔انہوں نے کہا کہ آرٹیکل 370کی منسوخی سکیورٹی کونسل کی قراردادوں کی منافی اور کشمیریوں سے ان کی شناخت چھیننے کی کوشش ہے، غیر قانونی بھارتی زیر تسلط جموں وکشمیر کے عوام 77 سال سے اپنا حق مانگ رہے ہیں، خطے میں عدم استحکام کی بڑی وجہ بھارتی توسیع پسندانہ عزائم اورجموں وکشمیر پر بھارت کا غیر قانونی قبضہ ہے، کشمیری عوام کو یقین دلاتا ہوں کہ پاکستان حق خود ارادیت کی جائز جدوجہد میں ہمیشہ ان کے ساتھ کھڑا رہے گا۔ انہوں نے اقوام متحدہ سے مقبوضہ کشمیر میں انسانی حقوق کی پامالیوں کا نوٹس لینے کا مطالبہ کیا۔