انٹر سروسز پبلک ریلیشنز (آئی ایس پی آر) نے بتایا کہ خیبرپختونخوا میں سیکیورٹی فورسز کی جانب سے کی گئی دو مختلف کارروائیوں میں دو فوجی اہلکار شہید جبکہ دو دہشت گرد ہلاک اور تین کو گرفتار کر لیا گیا۔
بدھ کو آئی ایس پی آر کی جانب سے جاری کردہ ایک بیان کے مطابق انٹیلی جنس کی بنیاد پر آپریشن ڈیرہ اسماعیل خان کے ضلع ٹانک میں کیا گیا جب کہ دوسری کارروائی جنوبی وزیرستان کے گاؤں کوٹ کلی میں کی گئی۔
آئی ایس پی آر نے بتایا کہ فائرنگ کے تبادلے میں دو دہشت گرد مارے گئے اور تین کو گرفتار کر لیا گیا جبکہ ایک نے خود کو سکیورٹی فورسز کے حوالے کر دیا، آئی ایس پی آر نے مزید کہا کہ دہشت گردوں کے قبضے سے اسلحہ اور گولہ بارود کا بڑا ذخیرہ برآمد ہوا ہے۔
آئی ایس پی آر کے مطابق آپریشنز کے دوران کرک کے رہائشی 31 سالہ سپاہی فرید اللہ اور ڈیرہ اسماعیل خان کے رہائشی 29 سالہ سپاہی شعیب حسن نے دہشت گردوں سے بہادری سے لڑتے ہوئے جام شہادت نوش کیا۔