نون لیگ مسلسل الزام لگا رہی تھی کہ عمران خان کو جیل میں شہزادوں کی طرح رکھا گیا ہے انہیں وی آئی پی پروٹوکول مل رہا ہے ہزاروں روپے کا کھانا ہر روز کھلایا جارہا ہے – اس پر عوام بھی جاننا چاہتی کہ اصل حقیقت کیا ہے انہیں جیل میں کون کون سی سہولیات فراہم کی گئی ہیں ،آج جیل حکام کی جانب سے بانی پی ٹی آئی عمران خان کو جیل میں میسرسہولیات سےمتعلق رپورٹ لاہور ہائیکورٹ میں جمع کروادی گئی۔رپورٹ میں بتایا گیا کہ بانی پی ٹی آئی عمران خان کو 7 سیلز پر مشتمل سیکیوریٹی وارڈ میں رکھا گیا ہے، 7 میں سے 2 سیل بانی پی ٹی آئی کے زیر استعمال ہیں، 5 سیل سکیورٹی کی وجوہات کی بنا پر بند رکھے گئے ہیں، ان سیلز کے صحن کو عمران خان چہل قدمی کے لیے استعمال کرتے ہیں، بانی پی ٹی آئی کے لیے 15 پولیس اہلکار تعینات ہیں، جن میں سے دو سکیورٹی افسران ہیں، 3 اہلکار بانی پی ٹی آئی عمران خان کی سیکیوریٹی کے لیے لگائے گئے بانی پی ٹی آئی کے سیل تک کسی کی رسائی بہت محدود ہے، عام شخص یا سرکاری اہلکار بغیر اجازت وہاں تک نہیں پہنچ سکتا۔
رپورٹ میں مزید کہا گیا کہ بانی پی ٹی آئی عمران خان کے وارڈ کی حفاظت کے لیے پیشہ ور تربیت یافتہ افراد مامورہیں، بانی پی ٹی آئی کی سکیورٹی پر ماہانہ 12 لاکھ روپے کا خرچ آتا ہے، ان کی سیکیوریٹی کے لیے لگائے گئے کیمروں پر 5 لاکھ روپے کا خرچ آیا۔عمران خان کے کھانے سے متعلق رپورٹ میں کہا گیا کہ ان کے کھانے کے لیے سپیشل قواعد و ضوابط تشکیل دیے گئے ہیں،سابق وزیراعظم عمران خان کو صحت افزا کھانا مہیا کیا جاتا ہے جو کہ ایک سپیشل کچن میں بنتا ہے، عمران خان کا کھانا اسسٹنٹ سپرنٹنڈنٹ جیل کی نگرانی میں تیار کیا جاتا ہے، کھانا فراہم کرنے سے قبل ایک میڈیکل افسر یا ڈپٹی سپرنٹنڈنٹ جیل اس کا معائنہ کرتا ہے، جیل کے میڈیکل افسر کے علاوہ راولپنڈی کے ایک ہسپتال کے 6 میڈیکل افسران عمرن خان کے میڈیکل ٹریٹمنٹ کے لیے تعینات ہیں، راولپنڈی کے ایک دوسرے ہسپتال کے سپیشلسٹ کی ٹیم جیل کا ہفتہ وار دورہ کرتی ہے، سپیشلسٹ کی ٹیم ضرورت پڑنے پر سابق وزیراعظم کا چیک اپ کرتی ہے۔
عدالتی حکم کے بعد عمران خان سے ان کی وکلاء کی ٹیم کے علاوہ ان کی فیملی اور چند اہم اور مخصوص سیاست دانوں کی ملاقات بھی کروائی جاتی ہے رپورٹ میں مزید کہا گیا کہ بانی پی ٹی آئی عمران خان کو چہل قدمی کے لیے جیل میں ایک خاص جگہ فراہم کی گئی ہے، بانی پی ٹی آئی کو جیل میں ورزش کے لیے مشین اور دیگر اشیا فراہم کی گئی ہیں، ملاقات کے لیے آنے جانے کے لیے بانی پی ٹی آئی کے حوالے سے اہم قوائد و ضوابط بنائے گئے ہیں، بانی پی ٹی آئی کے جیل ٹرائل کے دوران، ایک جامع سکیورٹی پلان پر عملدرآمد کیا جاتا ہے، اڈیالہ جیل کی حفاظت کے لیے پولیس، رینجرز سمیت مختلف محکموں نے فرضی مشقیں بھی کیں، اڈیالہ جیل کی جانب جانے والے روڈ پر پولیس کی اضافی نفری تعینات ہے، اڈیالہ جیل کے ارد گرد رینجرز اور ایلیٹ فورس کے اہلکار گشت کرتے ہیں۔یاد رہے کہ اس سے قبل اڈیالہ جیل پر حملے کے لیے ائے مشکوک دہشت گرد بھی پکڑے گئے تھے جس کے بعد ان کے لیے سیکیوریٹی پلان کو اور بہتر بنایا گیا –