وزیر اطلاعات و نشریات مریم اورنگزیب نے کہا ہے کہ حکومت عوام کو کم نرخوں پر گھی فراہم کرنے کے لیے تین ارب روپے کی سبسڈی دے رہی ہے۔
پیر کو اسلام آباد میں ایک نیوز کانفرنس سے خطاب کرتے ہوئے انہوں نے نشاندہی کی کہ اوپن مارکیٹ میں گھی کی قیمت ساڑھے پانچ سو روپے فی کلو گرام ہے جب کہ یوٹیلیٹی اسٹورز کارپوریشن کے ذریعے اسے تین سو روپے فی کلو کے حساب سے فراہم کیا جا رہا ہے۔ اس میں ہر کلو گھی پر 250 روپے کی سبسڈی ہوتی ہے۔
وزیر اطلاعات نے کہا کہ یوٹیلیٹی سٹورز کے ذریعے دس کلو آٹے کا تھیلا چار سو روپے کم نرخوں پر بھی فراہم کیا جا رہا ہے۔ انہوں نے کہا کہ وزیر اعظم شہباز شریف کے وعدے کے مطابق خیبرپختونخوا میں اسی ریٹ پر آٹا دستیاب ہے۔
انہوں نے کہا کہ صوبے میں عوام کو گندم کے آٹے کی دستیابی کو یقینی بنانے کے لیے خیبرپختونخوا میں ایک سو موبائل یونٹس اور چھ سو اسٹیشنری سیل پوائنٹس سسٹم میں شامل کیے گئے ہیں۔
مریم اورنگزیب نے کہا کہ پرائس کنٹرول کمیٹیاں بھی بنا دی گئی ہیں۔ انہوں نے کہا کہ ذخیرہ اندوزی اور اشیائے ضروریہ کی سمگلنگ کو روکنے کے لیے اقدامات کیے جا رہے ہیں۔
وزیر اطلاعات نے کہا کہ آئندہ مالی سال کے بجٹ میں عوام کو سستا گھی، آٹا اور چینی کی فراہمی کے لیے سترہ ارب روپے رکھے گئے ہیں۔
انہوں نے پی ٹی آئی حکومت کی ناکامیوں کا ذکر کرتے ہوئے کہا کہ موجودہ حکومت معیشت کو استحکام کی طرف لے جانے کے لیے اقدامات کر رہی ہے۔ بجٹ میں زرعی شعبے کے لیے پیکج کا اعلان کیا گیا ہے۔
انہوں نے کہا کہ حکومت نے عوام کو ریلیف فراہم کرنے کے لیے عملی اقدامات کیے ہیں۔