کراچی: کراچی کے علاقے گلشن اقبال میں وفاقی اردو یونیورسٹی کے قریب جمعہ کو آتشزدگی کے واقعے میں ایک ہی خاندان کے 5 بچے جاں بحق ہوگئے۔
واقعہ بلاک 19 کے پیچھے ایک کچی آبادی میں بجلی کے شارٹ سرکٹ کے باعث پیش آیا، جہاں 500 سے زائد جھونپڑیاں غیر قانونی طور پر قائم ہیں۔ آگ لگنے سے متاثرہ خاندان کی جھونپڑی اور اس کے قریب کھڑا ایک رکشہ مکمل طور پر جل گیا۔ چار دیگر جھونپڑیوں کو بھی جزوی نقصان پہنچا۔
پولیس نے بتایا کہ جاں بحق ہونے والے بہن بھائیوں کی شناخت 12 سالہ صائمہ، 8 سالہ طیبہ، 11 سالہ فرحان، 9 سالہ کامران اور 4 سالہ زیبا کے نام سے ہوئی ہے۔
دریں اثناء ڈسٹرکٹ ہیڈ کوارٹر ہسپتال میانوالی کے چلڈرن وارڈ میں جمعہ کو آگ لگنے سے 21 بچے اور تین خواتین جھلس کر زخمی ہو گئیں۔
ریسکیو 1122 کی ٹیموں نے فوری طور پر پہنچ کر ریسکیو آپریشن مکمل کیا اور تمام زخمیوں کو ٹراما سینٹر منتقل کیا جہاں انہیں ابتدائی طبی امداد فراہم کی گئی۔
ذرائع کا کہنا ہے کہ آگ شارٹ سرکٹ سے لگی۔
