کپتان کے ساتھ کھڑے ہونے والے دبنگ سیاست دان اور عوامی مسلم لیگ کے سربراہ و سابق وفاقی وزیر داخلہ شیخ رشید احمد نے کہا ہے کہ نگران وزیراعظم ہر پارٹی کی جیب میں موجود ہے لیکن بائیو میٹرک نہیں ہو رہا-
ان کا کہنا تھا کہ 8 روز میں صرف ترقیوں تبدیلیوں تعیناتیوں اور تختیاں لگانے کا ہی فیصلہ نہیں ہونا بلکہ ن لیگ کی گھریلو سیاسی لڑائی اور طاقتور لوگوں سے الھجے ہوئے معاملات کا بھی فیصلہ ہونا ہے۔
سابق وزیرداخلہ کا کہنا تھا کہ تمام اتحادی جماعتوں کو ایک ایسے نگران وزیراعظم کی ضروت ہے جوچابی کا کھلونا ہو، فرمائشی پروگرام ہو، خواہش پر خبر بنائے، جب بیٹھنے کا کہیں تو بیٹھ جائے اٹھنے کا کہیں تو اٹھ کھڑا ہو، انھوں نے ایک اور دلچسپ بات بھی کہ ہر پارٹی کی جیب میں ایک نگران وزیراعظم موجود ہے لیکن بائیو میٹرک نہیں ہو رہا۔یعنی جہاں سے حمایت مطلوب ہے وہاں سے گرین سگنل نہیں مل رہا –
ہر پارٹی کی جیب میں نگران وزیراعظم موجود لیکن بائیو میٹرک نہیں ہو رہا، شیخ رشیدhttps://t.co/ZbYWMMyxo4#sheikhrasheed pic.twitter.com/k6mdAqbatM
— Jasarat News (@JasaratAlert) July 31, 2023
شیخ رشید کا کہنا تھا کہ جو 15 مہینے میں سفارتی پاسپورٹ کے باوجود اپنے بھائی نواز شریف کو پلاننگ کے تحت ملک نہیں لاسکے وہ غریب کے مسائل کیا حل کریں گے، جب پی ڈی ایم بغیر پروٹوکول کے عوام میں جائے گی تو ان کو اپنی مقبولیت کا اندازہ ہو جائے گا
انھوں نے کل کے پی کے میں ہونے والے دھماکے کے حوالے سے بات کرتے ہوئے کہا کہ جس ملک میں ایک دن میں 60 لوگ دہشگردی سے شہادت پائیں وہاں غیر ملکی سرمایہ کاری کون لائے گا۔ سابق وزیر داخلہ نے کہا کہ مریم نواز اور آصف زرداری کی خاموشی بے معنی اور بے مقصد نہیں، جب دوسروں کی شطرنج کے مہرے بنتے ہیں تو ان کی چالوں پر بھی کھیلنا پڑتا ہے –
شیخ رشید نے اپنے بیان میں کہا کہ ن لیگ کے بھی فاصلے بڑھ رہے ہیں، ایسا لگتا ہے کے دال میں کالا ہے، جو کچھ ہونا ہے ان ہی 10 دنوں میں سامنے آجانا ہے ہاتھ کرنے والوں کے ساتھ بھی ہاتھ ہو جاتا ہے اور یہ ہاتھ ملتے رہ جائیں گے۔
ان کا مزید کہنا تھا کہ سیاسی مطلع ابرآلود ہے، سیاسی ذلت اور رسوائی ان کا مقدر ہے، اس حکومت کو اقتدار میں آکر نہ خواص میں عزت ملی نہ ہی یہ عوام میں مقام پا سکے ۔
