اسلام آباد: صدر مملکت ڈاکٹر عارف علوی نے آئین کے آرٹیکل 175 کے تحت جسٹس عمر عطا بندیال کو چیف جسٹس پاکستان مقرر کردیا۔
موجودہ چیف جسٹس گلزار احمد نے 21 دسمبر 2019 کو سپریم کورٹ کے جج کے عہدے کا حلف اٹھایا اور وہ یکم فروری 2022 کو ریٹائر ہو جائیں گے۔
جسٹس بندیال کی تقرری کا اطلاق 2 فروری 2022 سے ہوگا۔
جسٹس بندیال سپریم کورٹ کے سینئر ترین جج ہیں اور پاکستان کے 28ویں چیف جسٹس کے طور پر چارج سنبھالیں گے۔
اس سے قبل جوڈیشل کمیشن آف پاکستان (جے سی پی) نے جسٹس عائشہ ملک کی بطور سپریم کورٹ جج نامزدگی کی منظوری دی تھی۔
منظور ہونے کی صورت میں جسٹس عائشہ سپریم کورٹ کی پہلی خاتون جج بن جائیں گی۔
سرکاری نیوز براڈکاسٹر پی ٹی وی نے ٹویٹ کیا کہ جے سی پی کا اجلاس چیف جسٹس احمد کی صدارت میں ہوا۔ یہ اجلاس جسٹس عائشہ کی ملک کی اعلیٰ ترین عدالت میں تعیناتی پر بات چیت کے لیے بلایا گیا تھا۔
جسٹس عائشہ کی ملک کی اعلیٰ ترین عدالت میں تقرری کے معاملے پر قانونی برادری تقسیم ہو گئی تھی جب سے چیف جسٹس نے انہیں گزشتہ سال اگست میں سپریم کورٹ کے جج کے طور پر تقرری کے لیے نامزد کیا تھا۔
جسٹس عائشہ لاہور ہائیکورٹ کے ججوں کی سنیارٹی لسٹ میں چوتھے نمبر پر ہیں۔ قانونی برادری میں بہت سے لوگوں نے ان کی تقرری کی مخالفت کی تھی کیونکہ ان کا خیال ہے کہ وہ سنیارٹی کے معیار پر پورا نہیں اترتی ہیں۔