الیکشن کمیشن آف پاکستان میں آج عید کی تعطیلات کے بعد سماعت کا سلسلہ دوبارہ شروع ہوگیا – اس موقع پر منحرف رکن نور عالم خان کے وکیل بیرسٹر گوہر نے الیکشن کمیشن کو بتایا کہ نور عالم خان کی جانب سے جواب جمع کروا دیا گیا ہے۔ عامر لیاقت حسین جواب پر دستخط کیلئے نہیں پہنچ سکے، تاہم وہ آج ہی دستخط کروا کر جواب جمع کروا دیں گے۔
دوسری جانب منحرف ارکان جن میں فرخ الطاف، عاصم نذیر، افضل خان دھاندلہ، نواب شیر وسیر، راجہ ریاض، ریاض مزاری ،احمد حسین ڈھیر، رانا قاسم نون، غفار وٹو، مخدوم سمیع الحسن گیلانی، مبین احمد، باسط سلطان، عامر گوپانگ، اجمل فاروق کھوسہ، ،خواتین امیدوار جویریہ ظفر، وجیہہ قمر، نزہت پٹھان، اور غیر مسلم اقلیتی امیدوار رمیش کمارشامل ہیں ان سب نے بھی اپنا جواب الیکشن کمیشن میں جواب کروا دیا۔
سماعت کے آغاز میں پاکستان تحریک انصاف کے وکیل نے کہا کہ ایم پی ایز کے کیس میں وکالت نامہ جمع کرانا چاہتے ہیں ان کا کہنا تھا کہ عثمان بزدار کا استعفیٰ متنازع ہے۔ فیصل چوہدری نے مزید کہا کہ پنجاب میں نئے وزیراعلیٰ کے الیکشن کیلئے پی ٹی آئی ارکان کو پیسوں کے ذریعے خریدا گیا ان کو مسلم لیگ ن کے ٹکٹ کی آفر دی گئی اور ان کا ایمان خریدا گیا جسکے بعد ان ضمیر فروش لوگوں نے پنجاب اسمبلی میں حمزہ کے حق میں ووٹ ڈال دیئے ہیں۔
پی ٹی آئی کے وکیل فیصل چوہدری نے الیکشن کمیشن سے مزید وقت کی استدعا کرتے ہوئے کہا کہ ہمیں جواب کا جائزہ لینے کا وقت دیا جائے۔ پی ٹی آئی کے وکیل کا یہ بھی کہنا تھا کہ جتنے جواب آ چکے ہیں، انہیں ایک دن میں پڑھ کر جواب دینا مشکل ہوگا، اسلیے مناسب ہوگا کہ دلائل منگل کے لیے رکھ لیں۔
چیف الیکشن کمشنر نے کہا کہ حیرت کی بات ہے ، ہمیں تو لگ رہا تھا کہ منحرف ارکان کے وکلاء وقت مانگیں گے۔ الیکشن کمیشن بلوچستان کے ممبر شاہ محمد جتوئی نے کہا کہ 14 مئی تک کمیشن نے فیصلہ کرنا ہے۔ اس دوران چیف الیکشن کمشنر نے ہدایت دی کہ منگل 10 مئی تک ہر صورت دلائل مکمل کرلیں تاکہ فیصلے کیلئے وقت مل سکے۔
چیف الیکشن کمشنر نے فریقین کو دلائل دینے کی ہدایت کرتے ہوئے کہا کہ کل دونوں فریقین کے دلائل سنیں گے۔ منحرف ارکان کے وکیل نے کہا کہ اگر جواب الجواب آیا تو تیاری کے لیے وقت درکار ہوگا۔ کیس کی مزید سماعت کل تک ملتوی کر دی گئی۔