بیٹی نے اپنے جگر کا عطیہ دے کر اپنے والد کی جان بچالی

سعودی عرب کے شہر تبوک میں ایک بیٹی نے اپنے والد کو اپنا جگر عطیہ کرکے نئی زندگی دے دی ، عاجل نیوز کے مطابق الاخباریہ ٹی وی کو انٹرویو دیتے ہوئے سعودی لڑکی عواطف البلوی نے بتایا کہ والد کچھ عرصہ سے جگر کے عارضے میں مبتلا تھے ان کا علاج کروایا گیا مگر کوئی فائدہ نہ ہوا ،علاج کے لئے کئی ہسپتالوں سے رجوع کیا مگر تمام ڈاکٹروں کی ایک ہی رائے تھی کہ زندگی بچانے کے لیے جگر کی پیوند کاری کے علاوہ کوئی آپشن نہیں ۔عواطف البلوی کا کہنا تھا کہ مجھ سمیت بہن بھائیوں کے ٹیسٹ لئے گئے تاکہ پیوند کاری کو میچ کیا جا سکے۔ میرے تمام نمونے سو فیصد والد سے میچ ہوگئے۔
انہوں نے بتایا کہ جس وقت ٹیسٹ دینے جا رہی تھی تو میرے دل میں یہی خواہش ابھر رہی تھی کہ خدا کرے کہ والد کو میرے جگر کا ٹکرا لگ جائے اللہ نے میری دعا سن لی اور میری یہ خواہش پوری ہوگئی۔ریاض کے کنگ فیصل سپیشلسٹ ہسپتال میں جگر کی پیوند کاری کا آپریشن کامیاب رہا۔ والد اور بیٹی دونوں کی حالت بہتر بتائی گئی ہے۔