بھارتی ارب پتی تاجر بھویش بھنڈاری ” گوتھم بدھ ” بن گئے

بھارتی ریاست گجرات سے تعلق رکھنے والے ارب پتی بزنس مین اور اس کی بیوی نے ناقابل یقین قدم اٹھاتے ہوئے اپنی تمام دولت غریبوں کی راہ میں بانٹ کر رہبانیت اختیار کرلی۔اگر یہ کہا جائے کہ وہ آج کے دور کے گوتما بدھا بن گئے ہین تو غلط نہ ہوگا کیونکہ انھوں نے بھی اسی طرح شاہی تخت و تاج کو لات مار کر عام لوگوں کی طرح زندگی گزارنے کا فیصلہ کیا تھا –
آج کے دور میں جب دنیا کے امیر افراد دنیابھر میں اپنا کاروبار پھیلاکر نمبر ون بننے کی دوڑ میں لگ کر اپنی نیندیں برباد کررہے ہیں ایسے میں کسی ارب پتی کاروباری کا اپنی تمام دولت اور جائیداد عطیہ کرکے دنیا سے کنارہ کش ہو جانا ناقابل یقین بات معلوم ہوتی ہے مگر بھویش بھنڈاری اور ان کی اہلیہ نے یہ قدم اٹھاکر بہت سوں کو حیران کر دیا ہے۔جین مت کے پیروکاراس جوڑے نے فروری میں اپنی تمام دولت، جس کی مالیت دو ارب روپے تھی، عطیہ کردی تھی اور ماہ رواں کے آخر میں وہ باضابطہ طور پر ایک تقریب میں اپنی عیش ع عشرت سے بھرپور گناہون مین لتھڑی زندگی چھوڑ کر تارک الدنیا ہوجائیں گے۔بھویش بھنڈاری کا تعلق گجرات کے شہر ہمت نگر سے ہے اور وہ کنسٹرکش کے شعبے سے وابستہ ہیں۔
ارب پتی کاروباری شخص اور ان کی اہلیہ کی زندگی میں اس انقلابی تبدیلی کا سبب ان کے نوجوان بیٹے اور بیٹی بنے ہیں۔ دو سال قبل اس جوڑے کی انیس سالہ بیٹی اور سولہ سالہ بیٹے نے رہبانیت اختیار کرلی تھی اور دکھی انسانیت کی خدمت کو اپنی زندگی کا نصب العین قرار دیا تھا ،اس کے بعد انھوں نے اپنے ماما پتا سے بھی اسی راہ پر آجانے کا مشورہ دیا اور انہی کے اصرار پر بھویش اور ان کی اہلیہ نے بھی عام زندگی ترک کردینے کا مشکل فیصلہ کیا۔بھویش اور ان کی شریک حیات 22 اپریل کو باضابطہ طور پر رہبانیت اختیار کرلیں گے جس کے بعد وہ اپنے تمام رشتے داروں سے مکمل طور پر قطع تعلق کرلیں گے اور انہیں اپنے ساتھ کوئی بھی مادّی شے رکھنے کی اجازت نہیں ہوگی، اس کے بعد وہ تازندگی برہنہ پا رہیں گے اور ان کا گزارہ لوگوں کی دی ہوئی خیرات پر ہوگا۔دیگر راہبوں کی طرح ان کے جسم پر صرف دو سفید کپڑے، ہاتھ میں کشکول اور ایک سفید جھاڑو ہوگا جسے وہ زمین پر بیٹھنے سے پہلے حشرات کو ہٹانے کے لیے استعمال کریں گے۔اپنی امارت کے لئے گجرات میں مشہور بھنڈاری خاندان کے دنیا کو چھوڑدینے کے فیصلے پر بہت سے لوگ حیران ہیں تاہم اپنی تمام دولت عطیہ کرکے رہبانیت اختیار کرنے والا یہ پہلا خاندان نہیں ہے، اس سے قبل بھی دنیا میں ایسی کئی مثالیں موجود ہیں جنھوں نے اپنی آخرت سنوارنے یا غریب لوگوں کے خالی پیٹ کو بھرنے کےلیے دنیا کی رنگین زندگی کو لات مار دی تھی ۔ایسے لوگوں کے نیک کاموں کی وجہ سے ہی اللہ پاک نے اس دھرتی کو اب تک آباد رکھا ہے اور ایسے ہی لوگوں کی وجہ سے یہ دنیا آباد ہے –