پاکستان میں برطانوی ہائی کمشنر کرسچن ٹرنر نے منگل کے روز کہا کہ پاکستان سے جو بھی اس موسم گرما میں برطانیہ جانا چاہتا ہے، وہ جلد از جلد ویزا کے لیے درخواست دے۔
ٹوئٹر پر اپنے ویڈیو پیغام میں ہائی کمشنر نے کہا کہ درخواست گزاروں کو چاہیے کہ وہ ہائی کمیشن کو اپنے بائیو میٹرک جمع کرانے کے دن سے کم از کم چھ ہفتے کا وقت دیں۔
انہوں نے کہا، “مجھے خوشی ہے کہ بہت سے طلباء بھی برطانیہ جانے کا ارادہ کر رہے ہیں، لیکن پیغام ایک ہی ہے۔ برائے مہربانی اپنے ویزا کے لیے جلد از جلد اپلائی کریں۔ میں مایوسی کے لیے دوبارہ معذرت خواہ ہوں۔
انہوں نے مزید کہا کہ ہمارے عوام سے عوام کے روابط ہماری یو کے پاک دوستی کا مرکز ہیں اور ہر سال برطانیہ اور پاکستان کے درمیان تقریباً نصف ملین دورے ہوتے ہیں۔
دریں اثناء منگل کو برطانوی ہائی کمیشن کے وفد نے وفاقی وزیر قانون و انصاف سینیٹر اعظم نذیر تارڑ سے ملاقات کی۔
وزارت کے ترجمان کے مطابق ملاقات میں باہمی دلچسپی کے امور اور قانون کے شعبے میں تعاون کو مزید فروغ دینے پر تبادلہ خیال کیا گیا۔
انہوں نے مزید کہا کہ دونوں ممالک کے درمیان قانون کے شعبے میں تعاون کے معاہدوں پر بات چیت ہوئی جس سے دونوں ممالک کو فائدہ ہوگا۔
دونوں حکومتوں کے درمیان قانونی تعلیم کے حوالے سے معاہدے ہوئے۔