دنیا میں کرکٹ میں سب سے زیادہ ٹی ٹونٹی کو پسند کیا جانے لگا ہے کیونکہ اس میں کم وقت میں تماشائیوں کو زیادہ انٹرٹینمنٹ مل جاتی ہے مگر اس کھیل میں اب آل راؤنڈرز بڑے بڑے کھلاڑیوں کو پیچھے چھوڑ رہے ہیں -قومی ٹیم کے سابق کپتان بابراعظم اور محمدرضوان ’ دی ہنڈریڈ لیگ ‘ میں کسی بھی ٹیم میں جگہ بنانے میں کامیاب نہیں ہو سکے لیکن شاہین شاہ آفریدی اور نسیم شاہ اس لیگ میں جگہ بنانے میں کامیاب ہوگئے ۔
تفصیلات کے مطابق برطانوی لیگ دی ہنڈریڈ کے ڈرافٹ میں 8 ٹیموں کے فرنچائزرز نے 32 کھلاڑیوں کو منتخب کیا، جس میں ملکی اور غیر ملکی کرکٹرز شامل تھے۔ شاہین شاہ آفریدی کو ویلش فائر نے ایک لاکھ یورو (یعنی 3 کروڑ 1 لاکھ پاکستانی روپے سے زائد) میں اپنے سکواڈ کا حصہ بنایا ہے ۔سال 2023 میں بھی حارث رؤف اور شاہین شاہ آفریدی بھی اسی ٹیم کا حصہ تھے ، رواں برس ویلش فائر کی ٹیم نے حارث کو ریٹین کیا تھا جبکہ شاہین کو ڈرافٹ سے منتخب کیا، اسی طرح اسامہ میر مانچسٹر اوریجنل کی نمائندگی کریں گے۔
پی ایس ایل میں اسلام آباد یونائیٹڈ کو ٹائٹل جتوانے میں اہم کردار ادا کرنے والے عماد وسیم کو ایک لاکھ پاؤنڈز (یعنی 3 کروڑ 53 لاکھ پاکستانی روپے سے زائد) میں ٹرینٹ راکٹس اپنی ٹیم کا حصہ بنایا جبکہ نسیم شاہ کو برمنگھم فینکس ایک لاکھ 25 ہزار یورو (یعنی 3 کروڑ 77 لاکھ پاکستان روپے سے زائد) میں خریدا۔
دیگر نامور کرکٹرز میں پی ایس ایل کا ٹائٹل جتوانے والی ٹیم اسلام آباد یونائیٹڈ کپتان شاداب خان، افتخار احمد، حسن علی اور سابق فاسٹ بولر محمد عامر کو کسی بھی فرنچائز نے منتخب نہیں کیا۔اسی طرح بین الاقوامی کرکٹرز کے قومی ٹیموں سے ریٹائرمنٹ لینے والے بڑے ناموں جیسے جیسن رائے، ڈیوڈ وارنر، ٹم ڈیوڈ، اور شکیب الحسن کو بھی کسی فرنچائز نے اپنے سکواڈ میں جگہ نہیں دی۔اس لیگ میں زیادہ تر ان کھلاڑیوں کی بولی لگائی گئی ہے جو آل راؤنڈر ہین یہی وجہ ہے کہ صرف بیٹنگ یا صرف باؤلنگ کرنے والے کھلاڑی اس لیگ میں نظر نہیں آئیں گے –
واضح رہے کہ دی ہنڈریڈ کا چوتھا ایڈیشن جولائی میں شروع ہوگا، چوتھے ایڈیشن میں مینز اور ویمنز کی 8-8 ٹیمیں حصہ لیں گی، ایونٹ کا پہلا میچ 23 جولائی کو لارڈز کے کرکٹ گراؤنڈ میں برمنگھم فینیکس اور اوول انوینسیبلز کے درمیان کھیلا جائے گا۔اس لیگ میں آل راؤنڈرز کی شرکت بتارہی ہے کہ آنے والے دنوں میں کرکٹ کے میدانوں میں صرف آل راؤنڈرز ہی آپ کو دنیا پر راج کرتے نظر آئیں گے –