بجٹ میں 200 یونٹ سے کم بجلی استعال کرنے والوں کے لیے خوشخبری

آئندہ بجٹ میں عوام کو ریلیف دینے کے لئے سابق وزیراعظم نوازشریف کی زیر صدارت اجلاس میں وفاقی اور پنجاب حکومت کے اخراجات کم کرنے اور 200 یونٹ سے کم بجلی استعمال کرنے والے صارفین کو ریلیف دینے پر اتفاق کیا گیا۔ آئندہ بجٹ کے حوالے سے ساڑھے 3 گھنٹے طویل مشاورتی اجلاس ہوا �جس میں وزیراعظم شہباز شریف، نائب وزیراعظم اسحاق ڈار اور وفاقی وزراء محمد اورنگزیب، ڈاکٹر مصدق ملک، اویس لغاری، عطاء تارڑ اور رانا تنویر حسین ، وزیراعلیٰ پنجاب مریم نواز، پارٹی کے سینئر رہنما سینیٹر پرویز رشید، وفاقی و صوبائی محکموں کے مختلف سیکرٹریز نے بھی شرکت کی۔
اجلاس میں آئندہ بجٹ میں عوام کو ہر ممکن ریلیف دینے کے اقدامات کی تجاویز پر مشاورت کی گئی، ۔اجلاس میں شرکت کرنے والے وفاقی وزراء اور سیکرٹریز نے اپنے اپنے محکموں کی جانب سے ممکنہ ریلیف کے اقدامات کی تجاویز پیش کیں ۔
وزیراعلیٰ پنجاب مریم نواز نے اپنی صوبائی حکومت کی جانب سے بھرپور ریلیف فراہم کرنے کے اقدامات تجویز کئے جبکہ سابق وزیراعظم نواز شریف نے بجٹ مشاورتی اجلاس میں اپنے وسیع تر سیاسی اور انتظامی تجربے کی بنیاد پر ہدایات بھی جاری کیں۔ وزیراعظم شہباز شریف نے کہا کہ ان کی حکومت کی پہلی ترجیح عوام کو ریلیف دینا ہے۔وفاقی وزیر خزانہ محمد اورنگزیب نے شرکاء کو موجودہ اقتصادی چیلنجز اور ان سے نپٹنے کے لئے حکومت کی تیاریوں اور حکمت عملی بارے آگاہ کیا۔ جبکہ ن لیگی رہنماو¿ں نے مشاورتی اجلاس میں سرکاری اخراجات کو کم کرنے پر اتفاق کیا۔شرکاءنے عوام کو ریلیف دینے کے لئے کم از کم 200 یونٹ تک کے بجلی صارفین کو ریلیف دینے اور وفاقی بجٹ آئی ایم ایف پروگرام کی شرائط کے مطابق مرتب کئے جانے پر اتفاق کیا گیا۔ یہ بھی فیصلہ ہوا کہ بجٹ میں موجودہ ٹیکس گزاروں پر مزید بوجھ ڈالنے کے بجائے ٹیکس بیس کو وسیع کرنے کے لئے ایف بی آر کو متحرک کیا جائے ۔
نوازشریف نے کہا کہ معاشی مشکلات کے باوجود عوام کو بجٹ میں ریلیف اور مہنگائی کم کرنے کے لئے ہر ممکن اقدامات کئے جائیں۔ مریم نواز نے بریفنگ میں بتایا کہ پنجاب حکومت کی کوششوں سے آٹے اور روٹی کی قیمتوں میں واضح کمی ہوئی ہے جبکہ غریب عوام کی زیر استعمال اشیاء اور اشیائے خوردو نوش کی قیمتوں میں کمی کے لئے مزید اقدامات بھی کئے جائیں گے۔