راولپنڈی: اسلامی تعاون تنظیم (او آئی سی) کے خصوصی سفیر برائے جموں و کشمیر سفیر یوسف الدوبے اور اسسٹنٹ سیکرٹری جنرل (انسانی امور) سفیر طارق علی بکیت نے جمعرات کو ایک اعلیٰ سطحی وفد کے ساتھ مظفرآباد کا دورہ کیا جس میں برادر مسلم ممالک بشمول سعودی عرب، مراکش، سوڈان اور مالدیپ کے پانچ سینئر سفارت کار بھی شامل تھے۔
انٹر سروسز پبلک ریلیشنز (آئی ایس پی آر) کی جانب سے جاری کردہ ایک بیان کے مطابق وفد نے آج تھوتھا ریفیوجی کیمپ کا دورہ کیا جہاں انہیں مقبوضہ جموں میں بھارتی مظالم سے فرار ہونے والے باشندوں کی سماجی و اقتصادی بہبود کے لیے کیے گئے وسیع اقدامات کے بارے میں بریفنگ دی گئی۔
فوج کے میڈیا ونگ نے بتایا کہ مندوبین نے پیشہ ورانہ تربیتی مرکز کا دورہ بھی کیا اور مہاجرین سے بات چیت کی۔
آئی ایس پی آر نے مزید کہا کہ بعد ازاں وفد نے بھارت اور پاکستان میں اقوام متحدہ کے ملٹری آبزرور گروپ سے ملاقات کی جہاں انہیں لائن آف کنٹرول (ایل او سی) پر سیکیورٹی مانیٹرنگ میکنزم اور موجودہ حالات کے بارے میں آگاہ کیا گیا۔
دورے کے دوران اعلیٰ سطحی وفد نے آزاد جموں و کشمیر (اے جے کے) کے صدر بیرسٹر سلطان محمود چوہدری اور وزیراعظم سردار عبدالقیوم نیازی سے ملاقاتوں کے علاوہ مختلف سیاسی جماعتوں کے نمائندوں اور سول سوسائٹی کے ارکان سے بھی ملاقاتیں کیں۔
وفد نے حکومت پاکستان کا شکریہ ادا کیا کہ انہیں کنٹرول لائن کا دورہ کرنے اور اردگرد کی صورتحال اور کشمیریوں پر بھارتی مظالم کے اثرات کے عینی شاہدین سے آگاہی حاصل کرنے کی اجازت دی گئی۔
اس سے قبل ایل او سی پر تعینات فوجی حکام نے او آئی سی کے سفیر ایلڈوبے کو فلیش پوائنٹ پر سیکیورٹی کی تازہ ترین صورتحال پر بریفنگ دی تھی۔
