وزیرقانون اعظم نذیر تارڑ نے عمران خان کی گرفتاری اور زیرالتوا مقدمات پر اقوام متحدہ کے ورکنگ گروپ کی رپورٹ پر ردعمل دیتے ہوئے اسے پاکستان کا داخلی معاملہ قرار دے دیا۔ اقوام متحدہ کے ورکنگ گروپ نے عمران خان کی گرفتاری کو غیر قانونی قرار دیتے ہوئے فوری رہائی کا مطالبہ کیا تھا –
اعظم نذیر تارڑ نے کہا کہ خود مختار ریاست کے طور پر پاکستان میں عدالتوں کے ذریعے آئین اور مروجہ قوانین پر عمل ہوتا ہے ، آئین، قانون اور عالمی اصولوں سے ماورا کوئی بھی مطالبہ امتیازی،جانبدارانہ اور عدل کے منافی کہلائے گا ،عمران خان ایک سزا یافتہ قیدی کے طور پر جیل میں ہیں، جہاں انہیں ملکی آئین و قانون اور عالمی اصولوں کے مطابق تمام حقوق حاصل ہیں، کئی مقدمات میں انہیں ریلیف ملنا شفاف اور منصفانہ ٹرائل عدالتی نظام کا مظہر ہے۔ یاد رہے کہ اقوام متحدہ کے انسانی حقوق ورکنگ گروپ نے گزشتہ روز بانی پی ٹی آئی کی حراست کا فیصلہ من مانی اور بین الاقوامی قانون کی خلاف وزری قرار دیا تھا۔اس وقت حکومت اور امریکہ کے درمیان کپتان کی وجہ سے اختلافات کی خلیج گہری ہونے کا خدشہ پیدا ہوگیا ہے یہی وجہ ہے کہ نون لیگ کے قریب ترین سمجھے جانے والے صحافی جن میں نجم سیٹھی ،مجیب الرحمان شامی ، حامد میر اور سہیل وڑائچ جیسے زیرک صحافی بھی اب حکومت کو اپنی پالیسیاں تبدیل کرنے کا مشورہ دے رہے ہیں –