ایون فیلڈ ریفرنس میں عدالتی سزا کالعدم قرار دینے کے لیے دائر مریم نواز کی درخواست پر رجسٹرار اسلام آباد ہائیکورٹ کے اعتراضات دور ہو گئے۔
نائب صدر مسلم لیگ ن ایون فیلڈ ریفرنس میں سزا کالعدم قرار دینے کے لیے دائر متفرق درخواست پر رجسٹرار اسلام آباد ہائیکورٹ کی جانب سے دائر اعتراضات دور کرنے کے لیے اسلام آباد ہائیکورٹ میں پیش ہوئیں۔
سزا کے خلاف دائر متفرق درخواست پر شہباز شریف کے ساتھ ہونے سے متعلق سوال پر مریم نواز کا کہنا تھا آپ مجھ سے میری بات کریں، جماعت کو درمیان میں نہ لائیں۔
مریم نواز کی متفرق درخواست پر رجسٹرار آفس کے اعتراضات دور ہونے کے بعد اسلام آباد ہائیکورٹ نے درخواست 13 اکتوبر کو سماعت کیلئے مقرر کرنے کی ہدایت کر دی۔
خیال رہے کہ رجسٹرار آفس اسلام آباد ہائیکورٹ نے مریم نواز کی متفرق درخواست پر دو اعتراضات دائر کرتے ہوئے کہا تھا کہ مریم نواز نے اس درخواست میں وہی استدعا کی جو مرکزی اپیل میں کی تھی جبکہ مریم نواز فریش گراؤنڈز کورٹ کی اجازت سے ہی اپیل کر سکتی ہیں۔