آزادکشمیر میں بھی پی ٹی آئی کے لیے نئی آفت نے جنم لے لیا ہے قومی اسمبلی اور صوبائی اسمبلیوں میں پی ٹی آئی کے باغی اراکین کے بعد آزاد کشمیر میں بھی یہی صورتحال ہے یہاں کے وزیراعظم نے عمران خان کے خلاف علم بغاوت بلند کردیا -جس کے بعد پی ٹی آئی خوداپنے ہی وزیراعظم کے خلاف عدم اعتماد لانے پر مجبور ہوگئی -اس کے جواب میں آزاد جموں و کشمیر کے وزیر اعظم سردار عبدالقیوم نیازی نے جمعرات کو بدعنوانی اور مشکوک سرگرمیوں کے الزام میں پانچ وزراء کو برطرف کر دیا۔وزیراعظم کی جانب سے جاری نوٹیفکیشن کے مطابق سردار تنویر الیاس، عبدالمجید خان، علی شان سونی، خواجہ فاروق اور اکبر ابراہیم کو کابینہ سے ہٹا دیا گیا ہے۔آزاد جموں و کشمیر کے وزیراعظم کے ترجمان نے کہا کہ انہیں مبینہ بدعنوانی کے الزام میں برطرف کیا گیا ہے۔
نوٹیفکیشن میں کہا گیا ہے کہ آزاد جموں و کشمیر قانون ساز اسمبلی کے اراکین کو بدعنوانی، غلط کاموں اور بددیانتی کی بنیاد پر وزیر کے عہدے سے فوری طور پر ہٹا دیا جاتا ہے۔
یہ پیشرفت آزاد جموں و کشمیر کے وزیر اعظم سردار عبدالقیوم نیازی اور پی ٹی آئی چیئرمین عمران خان کے درمیان اسلام آباد میں بنی گالہ کی رہائش گاہ پر مبینہ طور پر ناخوشگوار ملاقات کے ایک دن بعد سامنے آئی ہے۔پارٹی ذرائع نے بتایا کہ پی ٹی آئی کے قانون سازوں کی طرف سے ان کے خلاف پیش کی گئی تحریک عدم اعتماد پر رد عمل ظاہر کرتے ہوئے، عبدالقیوم خان نیازی نے سابق وزیر امور کشمیر علی امین گنڈا پور پر 300 ملین روپے وصول کرنے کے بعد ان کے خلاف سازش کرنے کا الزام لگایا۔
ذرائع نے مزید کہا کہ عمران خان الزامات سے حیران رہ گئے اور انہوں نے فوری طور پر پارٹی کے وائس چیئرمین شاہ محمود قریشی کی سربراہی میں تحقیقاتی کمیٹی تشکیل دی۔بعد ازاں آزاد جموں و کشمیر کے وزیراعظم کو بتایا گیا کہ تحقیقاتی کمیٹی کو رشوت ستانی کے الزامات کی حمایت میں کوئی ثبوت نہیں ملا اور ان کے خلاف تحریک عدم اعتماد پر کارروائی جاری رہے گی۔
اپنے قریبی ساتھیوں سے مشاورت کے بعد سردار عبدالقیوم نے ہتھیار ڈالنے اور مزاحمت نہ کرنے کا فیصلہ کیا۔