ترک لینڈ فوج کے سپہ سالار آج کل پاکستان کے دورے پر ہیں جہاں وہ ملک کی اہم شخصیات سے ملاقاتیں کررہے ہیں -اسی سلسلے میں عاصم منیر سے ترک لینڈ فورسز کے کمانڈر جنرل سیلکوک بیرکتار اوغلو نے جی ایچ کیو میں ملاقات کی ہے، جس میں باہمی دلچسپی کے امور اور دوطرفہ دفاعی تعاون مزید بڑھانے پر تبادلہ خیال کیا گیا۔پاک فوج کے شعبہ تعلقات عامہ کے مطابق فریقین نے دونوں ممالک کے درمیان تاریخی، ثقافتی اور مذہبی تعلقات پر اطمینان کا اظہار کیا۔
آرمی چیف نے دونوں مسلح افواج کے درمیان موجودہ تعاون مزید مضبوط بنانے کی ضرورت پر زور دیا۔معزز مہمان نے خطے میں امن و استحکام یقینی بنانے میں پاک فوج کے کردار کو سراہا۔ آئی ایس پی آر کے مطابق جی ایچ کیو آمد پر ترک لینڈ فورسز کے کمانڈر نے یادگار شہدا پر پھولوں کی چادر چڑھائی۔ پاک فوج کے چاق چوبند دستے نے معزز مہمان کو گارڈ آف آنر پیش کیا۔
